Pero todo cambia cando Gladius, o influencer máis admirado pola comunidade, repara nela. En canto lle pide participar na súa nova serie, a vida dálle un xiro radical. Entra no reino das elixidas e nada volve ser coma antes.
Fóra de campo enfoca o que fica alén do plano, o que se pode intuír pero non se ve, nese espazo onde se revela a cara oculta das redes sociais, o poder das contendas cotiás, os fíos que unen as mulleres que non se deixan enredar.
Fóra de campo fala unha linguaxe contemporánea onde conflúen as artes escénicas, plásticas e musicais.
Rosalía fernández rial (Muxía, 1988) é filóloga, doutora en Didáctica das Linguas e da Expresión Dramática pola USC, música e performer. Dedícase á escrita desde moi nova e, como poeta, publicou, entre outros, os libros En clave de sol (2009), Ningún amante sabe conducir (2014), Árbores no deserto (Galaxia, 2020) e De centeo e durmideiras (2024). No ámbito da narrativa deu ao prelo Bonus Track (Galaxia, 2016) e, no do ensaio, Mover ficha (Galaxia, 2024).